അസാധ്യ രുചിയില്‍ ഒരു കിളിക്കൂട് (മലബാര്‍ സ്നാക്ക്)
ചേരുവകള്‍:
ചിക്കന്‍ - 250 ഗ്രാം
സവോള - 2 എണ്ണം
പച്ചമുളക് - 2-3 എണ്ണം
ഇഞ്ചി, വെളുത്തുള്ളി ചതച്ചത് - 1 ടേബിള്‍സ്പൂണ്‍
കറിവേപ്പില - കുറച്ച് (അരിഞ്ഞെടുക്കണം)
മഞ്ഞള്‍പ്പൊടി - 1/4 ടീസ്പൂണ്‍
മുളകുപൊടി - 1 1/2 ടീസ്പൂണ്‍
കുരുമുളകുപൊടി - 1/4 ടീസ്പൂണ്‍
ഗരംമസാലപൊടി - 1/4 ടീസ്പൂണ്‍
ഉപ്പ് - പാകത്തിന്
ഉരുളക്കിഴങ്ങ് - രണ്ടെണ്ണം
സേമിയ - ആവശ്യത്തിന്
മുട്ട - 3 എണ്ണം
എണ്ണ - വറുത്തെടുക്കാന്‍ ആവശ്യത്തിന്
തയ്യാറാക്കുന്ന വിധം:
ചിക്കന്‍ കഴുകി വെള്ളം വാര്‍ന്നശേഷം ഉപ്പും ഒരു നുള്ള് മഞ്ഞള്‍പ്പൊടിയും 1/2 ടീസ്പൂണ്‍ മുളകുപൊടിയും ചേര്‍ത്ത് വേവിച്ച് എല്ല്‌ മാറ്റി മിന്‍സ് ചെയ്ത് മാറ്റിവെക്കുക.
ഉരുളക്കിഴങ്ങ് പുഴുങ്ങി നന്നായി ഉടച്ച് ഉപ്പ് ചേര്‍ത്ത് വെക്കുക.
പാന്‍ സ്റ്റൌവില്‍ വെച്ച് ചൂടാകുമ്പോള്‍ 2 ടേബിള്‍സ്പൂണ്‍ എണ്ണ ഒഴിച്ച് ചെറുതാക്കി അരിഞ്ഞ സവോളയും പച്ചമുളകും വഴറ്റുക. ഇതിലേക്ക് ഇഞ്ചി, വെളുത്തുള്ളി ചതച്ചത് ചേര്‍ത്ത് പച്ചമണം മാറുന്നതുവരെ നന്നായി വഴറ്റുക. അതിനുശേഷം മഞ്ഞള്‍പ്പൊടി, കുരുമുളകുപൊടി, ഗരംമസാലപൊടി, മുളകുപൊടി എന്നിവ ചേര്‍ത്ത് മൂത്ത് വരുമ്പോള്‍ മിന്‍സ് ചെയ്ത ചിക്കനും കൂടി ഇതില്‍ ചേര്‍ത്ത് വഴറ്റുക.
അടുത്തതായി പുഴുങ്ങി ഉടച്ച് ഉപ്പ് ചേര്‍ത്ത് വെച്ച ഉരുളക്കിഴങ്ങ് ഇതില്‍ ചേര്‍ത്ത് നന്നായി യോജിപ്പിക്കുക. ഇനി തണുക്കാനായി മാറ്റിവെക്കാം.
ഈ സമയത്ത് രണ്ട് മുട്ട പുഴുങ്ങി ഓരോന്നും 4 കഷണങ്ങളാക്കി മുറിച്ചെടുക്കുക.
തണുക്കാനായി മാറ്റി വെച്ച കൂട്ടില്‍ നിന്നും ഓരോ ഉരുളകള്‍ എടുത്ത് കൈയില്‍ വെച്ച് ചെറുതായി പരത്തി ഉള്ളില്‍ ഒരു മുട്ടക്കഷണം വെച്ച് ഉരുട്ടിയെടുത്ത് ചെറുതായി ഒന്ന് അമര്‍ത്തിയെടുക്കുക.(കിളിക്കൂടിന്റെ ആകൃതി കിട്ടാനാണ്‌ ഇങ്ങനെ ചെയ്യുന്നത്)
എല്ലാം ഇതുപോലെ ആക്കിയെടുത്ത ശേഷം ആദ്യം മുട്ട അടിച്ചെടുത്തതില്‍ മുക്കി, പിന്നീട് സേമിയ പൊടിച്ചതിലും മുക്കി ചൂടായ എണ്ണയില്‍ ഗോള്‍ഡന്‍ ബ്രൌണ്‍ നിറത്തില്‍ വറുത്തുകോരുക
കിടിലന്‍ കിളിക്കൂട് Ready !
